मोटघरे यांनी सादरीकरणातून दिली चंद्रपूर जिल्ह्यातील प्रदुषणाबाबत माहिती !
मुंबई (प्रति.): मुंबई च्या सह्याद्री अतिथीगृह येथील सभागृहात चंद्रपूर जिल्हा प्रदुषणा नियंत्रणाबाबत बैठकीचे आयोजन करण्यात आले. या बैठकीला महाराष्ट्र प्रदुषण नियंत्रण मंडळाचे सदस्य सचिव अविनाश ढाकणे, सहसंचालक विद्यानंद मोटघरे, चंद्रपूरचे जिल्हाधिकारी विनय गौडा, मुख्य कार्यकारी अधिकारी विवेक जॉन्सन, मनपा आयुक्त विपीन पालीवाल, एसटी महामंडळाचे व्यवस्थापकीय संचालक शेखर चन्ने आदी, उप-प्रादेशिक परिवहन अधिकारी किरण मोरे आदी उपस्थित होते.
यावेळी प्रदुषण नियंत्रण मंडळाचे सहसंचालक श्री. मोटघरे यांनी सादरीकरणातून चंद्रपूर जिल्ह्यातील प्रदुषणाबाबत माहिती दिली. तसेच उपाययोजना सांगितल्या. यावेळी संबंधित विभागांचे अधिकारी उपस्थित होते.
नाम. मुनगंटीवार यांनी मुंबई येथील बैठकीत अधिकाऱ्यांना दिले निर्देश !
चंद्रपूर जिल्ह्यात विविध प्रकारचे उद्योग आहेत. त्याचप्रमाणे शहराच्या परिसरातही उद्योग आहेत. या उद्योगांमध्ये स्टील, कागद, सिमेंट, औष्णिक वीज यांचा समावेश आहे. शहर परिसरात उद्योगांमुळे वायु, जल प्रदुषणासह आरोग्यावर परिणाम होत आहे. जिल्ह्यातील विविध उद्योगांमधील प्रदुषण नियंत्रणासाठी जगात असलेल्या चांगल्यात चांगल्या कार्यपद्धती अंमलात आणाव्यात, असे निर्देश वनमंत्री सुधीर मुनगंटीवार यांनी मुंबई येथील बैठकीत दिले. तसेच जिल्हा प्रदुषण नियंत्रणाचा मास्टर प्लान तयार करण्याच्या सूचनाही त्यांनी दिल्या आहेत.
चंद्रपूर शहरातील रामाळा तलावाला प्रदुषणमूक्त करून सौंदर्यीकरण करण्याच्या सूचना करीत श्री. मुनगंटीवार म्हणाले, रामाळा तलावाचे सौंदर्यीकरण पूर्ण करावे. तसेच प्रदुषणाबाबत नागरिकांमध्ये जनजागृती करावी. त्यासाठी मोहीम स्वरूपात कार्यक्रम राबवावा. प्रदुषण दाखविणारा डिजीटल फलक शहरात प्रमुख चौकांमध्ये लावावा. प्रदुषण पातळीवरून नागरिकांनी कशा पद्धतीने काळजी घेतली पाहिजे, याबाबतही नागरिकांना मार्गदर्शन करावे. शालेय विद्यार्थ्यांमध्ये प्रदुषणाचा आरोग्यावरील परिणामांबाबत जनजागृती करावी.
श्री. मुनगंटीवार पुढे म्हणाले, प्रदुषणाबाबत सध्या अस्तित्वात असलेले नियम, कायदे, राष्ट्रीय हरीत लवादाचे निर्णय आदींबाबत छोट्या- छोट्या पुस्तिका तयार कराव्यात. नागरिकांना याबाबत जागरूक करावे. चंद्रपूर जिल्ह्यातील महाराष्ट्र प्रदुषण नियंत्रण मंडळातील रिक्त पदे भरावीत. तसेच जिल्ह्यात खनिकर्म निधीमधून स्मशानभूमी देण्यात येणार आहे. यामध्ये दहन विधीसाठी पारंपारीक पद्धतीऐवजी नवीन तंत्रज्ञान वापरून पर्यावरण पूरक पद्धत वापरण्यात यावी. यासाठी यामधील नवीन तंत्रज्ञान तपासण्यात यावे.
0 Comments